حبايب : ارقص يا حضرى

الشوارع فاضية والناس مش عارفة تودى فلوسها فين والحياة وردى والمواصلات كتييييييييييييييييييير والسلام فى كل مكان وكله تمام التمام لدرجة ان الرئيس مبارك يعنى الراجل مش عارف يعمل ايه من كتر ما كل حاجة كويسة فقال ما دمت فاضى بقى احل مشكلة عصام الحضرى

اه اصله بصراحة يعنى مينفعش بلد متأدمة وديموقراطية وتقف فى وش لاعب عايز يحترف الله ماهو حر برده ومن حقه وبعدين يعنى الراجل مقصرش الراجل يعنى جابلكو الكاس فميصحش يقعد فى مصر كتيييييييير انتو ايه طماعين ولا ايه هتنهبوا ايه عايزين كاس تانى ولا ايه؟؟؟!...

لا طبعا يا سيادة الريس كاس ايه وكلام فارغ ايه اهم حاجة ان الحضرى يرتاح وطزززززززز فى المصريين كلهم يعنى عشان بيحبوه يخنقوه لا انحرف يا حضرى يا خويا انحرف آسفة قصدى احترف يعنى روح سويسرا بصمجية الكورة آه صحيح انت قلت انك شوية وهتخلع وتسيبهم وهما اصلهم عبط هيسيبوك بالساهل

يعنى والله مش عارفين نودى جمايلك فين يا ريس يعنى والله الله يخرب بيتك ايه ده قصدى الله يخليك وتعيش كدة وتقرفنا يوووووووه قصدى تحللنا مشاكلنا اللى يعنى قليلة جدا جدا جدا لدرجة ان الواحد بقى بيتلكك كدة على مشكلة عشان يتكلم فيها

يعنى الريس يا جماعة تدخل وبنفسويته كده هوه ايوة الله بنفسه عشان يحل مشكلة الحضرى واتكلم مع سمير زاهر وقاله خليه يسافر

يعنى قرار مش عارفين نقولك ايه عليه

محدش يا جماعة عايز يسافر نكلمله الريس يسفره

انت وانت يعملوا بيك ايه هناك انت خليك بلا وكسة امال هم هيقرفوا مين ويطلعوا عين مين ويغلوا الاسعار على مين ؟

ممكن نسفرك فى حالة واحدة اذا كنت لاعب مشهور

او عالم ذرة ولا اى حاجة كدة تفيد اللى انت رايحلهم

نحن وبلا فخر اكتر ناس نساعد كل الناس لدرجة ان احنا بننسى نساعد نفسنا

الغريب بقى ان الرئيس السويسرى بجلالة قدره واللى معندهوش اى مشاكل زينا الا ان عنده نسبة انتحار عالية وده يعنى مش لحاجة مش لانهم مش لاقيين ياكلوا ولا مش عارفين يعيشوا بالمرتب القليل ولا لانهم مش لاقيين شغل غير بس انهم عندهم فلوس كتير مش عارفين يعملوا بيها ايه فاشتروا بيها اسلحة وانتحروا

يعنى الراجل الرئيس السويسرى ده رغم قلة مشاكله الا انه لا سمعناه كدة نط على ودن رئيس النادى وقاله حل المشكلة ولا سمعناه اهتم حتى ولا علق رغم ان هو يعنى اللى محتاج

يعنى انا كنت اتوقع اقرا خبر ان الريس صرح بفتح رفح للفلسطينيين ان يصرح بتخفيض سعر ازازة الزيت انه يصرح بتعيين كام شاب

لكن الظاهر انى كنت متفائلة زياة عن اللزوم وفهمت الريس غلط خااااااااااااااالص

أنا آسفة يا ريس مش هفهمك غلط تانى