بحبك - حبايب

كل سنة يجى عيد الام ويقولولى ده عيد الام الشهر ده وامشى فى الشارع الاقى كل الناس شايلة هدايا عشان عيد الام والمحلات وشركات التجميل تعمل عروض اوكازيونات عشان عيد الام وقبل ما يجى عيد الام باسبوع تلاقى فى اعدادات كتير ماما : خلى بالكم اعملوا حسابكم ان يوم ........الجاى رايحين عند تيتا . وطبعا بعمل عبدو واقولها ليه كفاالله الشر هى تعبانة والا حاجة . تقوم بصالى نظرة ثاقبة كأنها عايزة تقولى الحدق يفهم . وترد لا عشان نوديلها عيد الام . ياااااااااااااه تصورى نسيت هوا احنا فى شهر 3 ياااااااااه طب مش تفكرينى قبلها بشوية عموما دى بدعة اعياد المسلمين اتنين بس العيد الكبير والعيد الصغير . وبما ان امى طيبة فبترد وتقولى اه انا معاكى فعلا بس احنا مش بنحتفل بيه بس فرصة عشان عماتك يتجمعوا وكدة ونتلم حوالين جدتك ونحسسها ان لسة ليها عيال لان المشاغل خلتنا محتاجين مناسبة عشان تلمنا وكمان اهو موافق يوم جمعة وكمان عشان المولد النبوى اهو يبقى 2 فى 1 ويجى عيد الام ونروح عند جدتى واللى هيحصل كالتالى سيناريو كل سنة ماما هتدى لجدتى هديتها وعينها هتدمع وتقولها ربنا يخليكى لينا وطبعا كلهم فاكرين ان مامتى بتدمع من حبها الشديد لحماتها بس طبعا الحقيقة مش كدة خالص انا بس اللى ببقى فاهمة هى بتعيط لانها بتفتكر مامتها الله يرحمها وكل سنة على كدة ولا بقى يا سلام لما يجيبوا فيلم فى التليفزيون عن الام والحاجات دى الاقى علب مناديل البيت كله جنب ماما والدموع بقى متتوصاش

الحقيقة مببقاش عارفة اعمل ايه فى المواقف دى لا بعرف ابوس على ايد ولا بعرف اعمل الحركات دى كل اللى بعمله انى اقلبها هزار واقولها ايه هى كريمة مختار بتاعة كل سنة هتطلع ؟ واقولها انا عارفة انتى بتعيطى ليه عشان مجبتلكيش يعنى هدية كويسة وانتى بتبقى داخلة على طمع بس اكتبى كل اعياد الام من ساعة ما اتولدت وانا لما اتجوز ابقى اجيبهملك كلهم اللى انتى عايزاه تقولى بس ياعبيطة انتم عندى اغلى من اى هدية أرجع معرفش ارد واقولها الله يكرمك انا قلت كدة برده ونضحك شوية ويعدى اليوم

ببقى نفسى والله اقولها انى بحبها اوى ببقى نفسى اقولها تسامحنى على اى حاجة عملتها فى حقها او بعملها من وراها ببقى نفسى اقولها ادعيلى بس الكلام مبيطلعش مبعرفش يمكن ده راجع لانى حاسة انها لسة صغيرة على الحركات دى واللى ممكن اقولها لجدتى بس مبعرفش اقولها لمامتى مش عارفة

بس عموما يمكن يجى يوم وتقرا الكلام ده يمكن اخليها تقراه مش عارفة بس

مش هقولك غير حاجة واحدة بس " انى بحبك " فى عيد من غير عيد " بحبك " ويا رب تعيشيلى طول عمرى ويارب يجى اليوم اللى اشرفك فيه فى الدنيا والاخرة

متعـــة الحديـــث